西流添强援
周六下午澳职首轮大战，西悉尼流浪者主场斗中岸水手。上季表现失望嘅西流，今季重整旗鼓引入多位实力派德甲兵，首战喺新建成嘅主场出击，唔想失威自然落多几成力，睇好佢哋旗开得胜，主胜值博。

美亚派文舒维加屈机
西流上季战绩令人失望，最终只获常规赛第8无缘季后赛，获球会留任嘅德国主帅巴布为带领队波重回正轨，今季即刻搵嚟几位强援助阵，除咗有过往喺德甲打滚多年嘅瑞士中场派文舒维加之外，最令球迷期待嘅莫过于前法兰克福当家前锋美亚，呢位36岁老将曾斩获93个德甲入波，级数绝对比啱啱离队嘅西班牙前锋奥利奥尔尼亚拿高几班，有望改善西流前场进攻质素。

中岸水手近年沦为澳职鱼腩，计埋上季最终积分榜垫底，近4季常规赛有3次都包尾，战力成疑。翻查往绩，西流近5次面对中岸水手获4胜，包括上季2次主场赢波，呢场西流喺新建嘅主场首次踢联赛，肯定唔想失礼，主胜好路。