日本用「外国势力」冲击世盃！日本足协前日宣布新一期「蓝武士」世盃外围赛23人名单，徵召咗喺欧联大放异彩嘅南野拓实，以至中岛翔哉、久保建英等20名外流球员，日职搵食嘅土炮只得3件，係日本起用外流国脚最多嘅一次。

浅野拓磨重新上榜
同9月嘅人选相比，今次日本前锋线变化较大，效力德甲云达不来梅嘅大迫勇也因为大髀伤患，需要休战4至6个礼拜而落选，北海道札幌冈萨多嘅铃木武藏亦冇份，反而浅野拓磨及鎌田大地就重新入围。分组赛首战作客两球淨胜缅甸嘅日本，嚟紧本月10日先喺主场出战蒙古，15日就作客杜尚别对塔吉克。