林柏特发功4星入围
下周又到国际赛档期，各大联赛纷纷让路，当中出战欧洲国家盃外围赛嘅英格兰，喺11日及14日分别作客捷克及主场对保加利亚，主帅修夫基日前公布大军名单，车路士中坚汤姆利首度获徵召，加埋首席射手谭美阿巴谦亦获重召，连同巴克里及美臣蒙特两大中场，英格兰实行全面「车仔化」！

喺欧国外A组4战全胜高踞榜首嘅英格兰，出线可以话问题不大，佢哋嚟紧分别面对捷克及保加利亚，主帅修夫基点兵一于「搞搞新意思」，除一班熟口熟面如哈利卡尼、史达宁、拉舒福特及佐敦轩达臣外，今次大户属于车路士，分别有汤姆利、谭美阿巴谦、巴克里及美臣蒙特入选，证明林柏特带领「蓝战士」所奉行嘅青春火花路线得到认同。

当中中坚汤姆利今季不乏落场机会，演出亦大获好评，尤其谭美阿巴谦及美臣蒙特更加属球会进攻灵魂，夹埋为车仔喺联赛轰入10粒，入选大国脚绝对合理。咪忘记车仔仲有中场罗夫度卓克同翼锋赫臣奥杜尔两位新星，话「三狮兵团」嚟紧係车仔天下，绝对唔过分。

「连美斯」阿里名落孙山
不过有人欢喜有人愁，曼联嘅连格同热刺中场迪利阿里就双双落选今次名单，「连美斯」今季冇脚好波，经常畀曼迷闹爆；而伤愈冇耐嘅阿里亦未能重拾最佳状态。至于今次有两位海外兵获徵召，分别为效力马德里体育会嘅捷比亚，以及多蒙特快翼查顿辛祖。