法甲头场演榜首战，联赛榜1哥巴黎圣日耳门（PSG）主场迎战2哥昂热。PSG伤兵已陆续康复，而且经过季初适应期，一众新兵亦逐渐融入球队，相信嚟紧PSG表现只会愈嚟愈好；昂热今季遇强即屈，一旦失守防线随时大崩溃，PSG让两球、两球半照捧上盘。

（myTV Gold 302、Now 639、Now 714、有线655、615、603及604台周六晚11时30分直播）

相比上季头14轮联赛全胜，PSG今季踢咗8轮已经输咗2场，表现的确冇咁霸气，不过摒除佢哋联赛输畀雷恩及兰斯，其实联赛连盃赛其馀9场全胜，包括喺欧联以3比0大胜皇家马德里，最重要係早前受伤嘅一对箭头基利安麦巴比、卡云尼已经伤愈，前者上场联赛对波尔多后备上阵，仲即刻交出助攻畀尼马一箭定江山；另外，今季来投喺阿根廷射手莫路伊卡迪喺周中欧联亦射入加盟后首个入波，协助球队作客1比0击败加拉塔沙雷，相信入波会陆续有来。

捧埋中位数3.5球大盘
昂热排联赛榜第2位，成绩远超预期，不过今季5场胜仗对手除波尔多之外，其馀4队都係榜下游球队，而且佢哋作客里昂曾经大败0比6，作客上届亚军里尔亦全失3分，摆明欺善怕恶，对住状态冒升嘅PSG随时被攻到慌，PSG让两球、两球半盘口虽然係辣啲，不过某程度上亦反映到庄家对主队大炒嘅信心，如果保险啲可以捧埋中位数3.5球嘅大盘。