周六晚英超早场，白礼顿主场迎击热刺。热刺今季表现跌晒Watt，尤其作客明显冇料到，相反「海鸥」主场出击球风硬朗，呢场对住劲敌摆出死守阵，热刺一班主力冇态好难破到严防，形势随时陷入胶着，中位数2.5球入球细係好路。

（Now 611及621周六晚7时30分直播）

热刺啱啱喺欧联主场以2比7侮辱性大败畀拜仁慕尼黑，分组赛2战不胜，士气被打入谷底，事实上，比起上季嗰支杀入欧联决赛、勇夺英超第4嘅超强表现，今季佢哋可以话係判若两队，连领队普捷天奴都坦言：「军心受动摇。」

热刺低迷状态亦直接影响作客成绩，早前联赛盃面对英乙球队高车士打，热刺就算派出孙兴民、基斯甸艾历臣同迪利阿里等大牌球星上阵，法定时间90分钟内都搞唔掂对手遭逼和0比0，最终仲要射输12码遭淘汰，足证佢哋嘅问题几咁严重。

钢门马菲赖恩靠得住
白礼顿英超主场虽然至今未赢过，可幸防守表现仲算硬淨，近5仗主场有4次开2球或以下，包括上仗联赛主场1比1逼和般尼，其中澳洲钢门马菲赖恩发挥神勇，有佢把关「海鸥」防守有保证。况且热刺近5次面对白礼顿，有4次开2球或以下，队中进攻乏力问题如果解决唔到，面对摆出铁桶阵应战嘅「海鸥」，热刺都好难有运行，捧番中位数2.5球入球细好过。