哑火曼联后备兵迎战
欧霸盃L组赛事，「红魔鬼」曼联喺海牙京瓷球场斗荷甲代表「AZ」阿尔克马尔。AZ今季喺各项比赛15场只输1场，其中对上3场联赛全胜兼冇失波，近况对办；反观曼联今季攻不锐、守不稳，作客让平半咪以为笋盘，计落真係拣唔落手，AZ下盘捧得过。

（myTV Gold 303、Now 643、有线616及656台周五凌晨零时55分直播）

阿尔克马尔主场AFAS球场上盖喺今年8月因受强风吹袭倒塌，暂时主场比赛都要移师海牙京瓷球场上演。AZ今届由欧霸盃第2圈外围赛打起，至今连同联赛一共踢咗15场比赛，取得8胜6和1负理想成绩，唯一输波嗰场仲要喺完场前失12码，先至输畀维迪斯，表现极之硬淨。AZ对上3场联赛先后击败海牙、飞燕诺及荷华高斯，而且连续3场都冇失波，依家喺荷甲排第3位，仅以1分落后榜首双雄阿积士及燕豪芬，绝对有真才实料。

红魔防线慌失失
红魔鬼首轮分组赛以1比0小胜哈萨克球队艾斯坦拿，表现唔算有说服力，嗰场比赛领队苏斯克查用咗大部分副选，包括马高斯卢祖、杜安薛比、尼曼查马迪、费特洛迪古斯及锺达希等等，结果曼联赢波输盘，今场好大机会照办煮碗。曼联喺英超揭幕战大胜车路士4比0，可惜之后无以为继，及后8场比赛从未试过单场入多过1球，而且除上述提过对艾斯坦拿，同联赛1比0赢李斯特城之外，其馀6场都有失波，表现攻不锐、守不稳，预计今场表现都唔慌会有突破。

曼联目前喺分组赛1战手执3分，所以今场输波或失分唔会係世界末日，睇番红魔对上一次出战欧霸盃分组赛，即2016/17年成功捧盃嗰届，当时曼联头2场作客分组赛都输波收场，包括0比1不敌另一支荷甲球队飞燕诺。以红魔今季喺各项赛事作客未赢过嘅表现嚟睇，今仗再输一啲都唔奇，红魔让平半，必捧AZ下盘。