干地打造钢铁防线
今晚欧联「死亡F组」重头戏，巴塞隆拿于主场鲁营球场火併国际米兰。巴塞队长美斯虽已复操，但啱啱先好番未必出得，冇咗佢进攻大打折扣；国米自铁帅干地接手后表现脱胎换骨，防线升晒呢，开季至今7战只失3球，有力阻挡主队进袭，何况近年交手例少交收，2.5球嘅细盘有2.2倍分头值博。

（Now 644、有线662及602台周四凌晨3时直播）

巴塞今夏天价签入基沙文，天才新星安素法迪亦崭露头角，可惜仲有「美斯依赖症」。经过季初一轮养伤后，呢位新鲜出炉嘅世界足球先生喺F组首轮闷和多蒙特0比0之役复出，不过状态明显未弗，喺上周中联赛快车更拉伤大腿被迫退下火线，就算近日已复操，但一伤再伤下，为稳阵起见今仗未必披甲，加上另一箭头苏亚雷斯亦跌Watt，令巴塞进攻效率下降，连盃赛在内至今8战赢得4场，有地利亦可胜不稳。

国米今仗有阿历斯山齐士倒戈旧东家，佢哋头6场联赛全胜咁叻仔，全赖新帅干地重新打造钢铁防线。佢当年率领车路士大踢「343」阵式，风靡英超，转教国米亦续用3人防线，新加盟嘅铁衞高甸之前喺西甲多番与巴塞交手，包括2014年煞科战顶入1比1扳平士哥，最终协助马体会封王，佢伙拍迪维积及史坚尼亚，经验与硬淨度兼备，配合瞻前顾后嘅翼衞迪岩布斯奥及卡华禾艾沙姆，呢条实而不华嘅防线力足抵御任何对手。

近7交锋6开2球或以下
不过国米喺F组首轮，只能赛和同组实力最弱嘅布拉格斯拉维亚1比1，若然今场再输，出线形势就相当被动，加上前线无论用卢卡古、阿历斯山齐士或拿达路马天尼斯担正，仍略嫌飘忽，预计国米会稳阵行先。翻查纪录，两军近7次交锋，有6次开2球或以下，包括上季于分组赛两仗，巴塞赢2比0及打和1比1，2.5球嘅细盘有2.2倍分头，值得捧场。