罗渣士KO布鲁士
今晚英超独脚戏，「狐狸」李斯特城主场迎战「喜鹊」纽卡素。李斯特城自罗渣士喺上季季中接手后，抢分能力飙升，撞正攻力疲弱嘅纽卡素，可藉地利再下一城，让球盘要让一球亦冇有怕，照拣上盘。

（Now 621周日晚11时30分直播）

从2016年神奇夺冠，到上季泰国班主维猜意外离世，李斯特城近年表现反覆，内讧不断，尤其係前主帅佩尔与球员关係紧张，并喺上季季中黯然下台，由罗渣士接手。呢位前利物浦及些路迪教头掌舵后疯狂抢分，自从今年2月26日起，直至上轮英超为止（唔计今轮），「狐狸」跨季联赛取得31分，只係仅次于联赛双雄曼城同利物浦，成为呢段时间抢分第3多球队，唔讲得笑。

斋讲今季，李斯特城开局表现唔错，头6场联赛只曾1败位居前列，当中不乏作客逼和车路士1比1、上轮喺主场反胜热刺2比1嘅硬仗，虽然罗帅谦称关心球队嘅表现多过赛果，但佢已逐渐令「狐狸」顺利过渡，3年前嘅夺冠功臣慢慢澹出或离队，正选只剩番占美华迪同卡斯柏舒米高，芝维尔、泰利文斯、占士麦迪臣等新仔亦趁机上位，难怪开季战绩稳步上扬。

纽卡素火力英超最弱
另一边厢，纽卡素赶走深受爱戴嘅主帅宾尼迪斯，搵嚟曾执教死敌新特兰嘅布鲁士接手，先天已经得罪球迷，而「肥布」亦相当黑仔，加盟冇耐就伤兵满营，就算辛特麦斯明、耶迪连、马特列治等已复操，但状态都成疑。「喜鹊」喺佢麾下，最大问题过于重视防守，令火力大跌Watt，开季头6场联赛赢得1场之馀，仲要入得4球咁大把，係联赛火力最弱球队之一，见到都唔开胃，让球盘李斯特城要让一球，上盘值得捧场。