球坛近几年发展似乎都係整体大于个人，球场上少咗一啲性格巨星。不过今日球迷有福喇，两大神人「巴神」巴洛迪利同「战神」伊巴谦莫域齐齐出场，巴洛迪利加盟意甲布雷西亚有望重振雄风，伊巴谦莫域愈老愈可爱，争取成为美职常规赛神射手，大家可以一睹两大神人风采。

唔愿输畀卡路士韦拿 伊巴抢神射手尽情数胡
美职常规赛仲有2轮煞科，名牌球队洛杉矶银河已经稳夺季后赛资格，不过王牌前锋伊巴谦莫域有机会争做神射手，主场对住西岸包尾嘅温哥华白帽定必加多两钱肉紧，3.5球大盘好路。

（myTV Gold 301、Now 638、有线614及654台周一早上7时30分直播）

银河球星伊巴谦莫域转入常规赛直路全面大爆发，对上12场联赛个人轰入10球，除咗带领银河稳入季后赛，自己亦以28个联赛入球排喺射手榜第2位，呢个入球数字唔只打破咗银河单季最高入球纪录，而且仲佔咗银河今季常规赛入波（53球）比率超过一半有多，效率够晒夸张。

对弱旅白帽银河不胜无归
伊巴依家喺射手榜落后FC洛杉矶射手卡路士韦拿2球。呢两大球星今季曾经就边个係美职最佳球员针锋相对，韦拿认为无论喺入球数目及助攻次数都比伊巴优胜；伊巴就觉得自己年纪较大，暗寸韦拿喺30岁前已经要去美职搵食，级数同自己唔同，试问伊巴点会甘心喺神射手榜屈居韦拿之后？呢场係银河今季常规赛最后一场主场赛事，对手又係西岸包尾、肯定无缘季后赛嘅温哥华白帽，以银河近5场主场联赛取得4胜1和走势，大有不胜无归之感，中位数3.5球大盘捧得过。

回流意甲博返国家队 巴神领布雷西亚大起里
有巴洛迪利加盟嘅布雷西亚，周中快车挑战完衞冕嘅祖云达斯之后，今晚又要对上季亚军拿玻里。布雷西亚出过唔少传奇球星，巴治奥、派路、赫杰及哥迪奥拿都曾经效力，上场已经处子上阵嘅巴洛迪利，今仗必然会正选出战，再加上拿玻里中坚高列巴尼停赛，「巴神」有机会取得入球，今仗捧3.5球入球大。

（myTV Gold 301、Now 638、有线654及614台周日晚6时30分直播）

布雷西亚从未攞过意甲冠军，今季係时隔8年再度重返意大利顶级联赛，多年来都徘徊喺意甲同意乙之间，但呢队波好似有种特别吸引力咁，搵到唔少大牌球星加盟。「神奇小马尾」巴治奥选择将自己职业生涯最后一站，喺布雷西亚结束；世界级中场派路更直接喺布雷西亚出道，之后再踏上大师之路。呢支意大利北部球队，大军名单亦出现过意大利射手东尼、罗马尼亚传奇赫杰、现任曼城领队哥迪奥拿嘅名字，近年就有斯洛伐克杀手咸锡。

嚟到2019年，布雷西亚球队史上又可以增加一个球星名字，佢就係巴洛迪利。29岁嘅「巴神」渴望出席2020年欧国盃决赛周，所以有唔少海外球会招手，佢都宁愿留喺意甲，希望可以再次披上意大利国家队球衣。蓝衫军主帅文仙尼同巴洛迪利感情深厚，有关注爱将加盟布雷西亚，佢被问及巴洛迪利再入国家队可能，文仙尼话：「佢只喺职业生涯中期，如果佢想嘅话，应该仲有一番作为。」暗示大门仍然为巴神打开，但仍然要睇呢名前锋自己造化。

拿玻里轰13球联赛之冠
巴洛迪利上场对祖云达斯表现中规中矩，但质素明显比队友高唔只一班，教练话佢嘅加盟激活咗其他队友，前锋当拿隆马更先开纪录，累积入咗4球，相信有「巴神」傍住，可以有更佳发挥。拿玻里虽然排第4，但5仗入13球係意甲暂时入波最多球队，双方有机会上演入球骚，3.5球入球大趁早买。