川崎神户癫斗癫
讲到周六日职重头戏，必属川崎前锋主场迎战神户胜利船，事关两队波打法大开大合，神户个「VIP组合」又重出江湖，必然会係一场癫凤斗狂龙嘅入球大骚。

（有线662及602台周六下午4时直播）

前锋现居第4位，落后榜首FC东京8分，成功衞冕嘅机会难以乐观，反而争取入前3名、抢来届亚冠盃入场券更实际，今场一定搏杀。佢哋两队本月中喺日皇盃碰头，当时前锋收起攻击主力中村宪刚、小林悠，咁啱大岛僚太、斋藤学又跛咗，搞到半场落后两球，易边后至放佢两个出嚟，可以话自己玩死自己，虽然喺0比3劣势下连追2球，可惜为时已晚，输2比3被摈出局，今场冤家路窄，中村宪刚、小林悠肯定担正，前锋自然渴望报番一箭之仇。

近8次交手炮製31球
无疑神户喺日皇盃赢到前锋，确实都唔係用至强阵容，韦拿休战，恩尼斯达养伤，但係中后场有齐华美伦、山口萤、沙治森柏同酒井高德，耳仔做手术养病3个半月嘅普多斯基亦喺末段披甲，平均人脚秤先过前锋，不过咁都畀前锋追番两球，后防真係令人不敢恭维。无可否认， 神户季中罗致埋酒井高德之后，本土球员同外援嘅沟通、配合得更好，的确改善咗战绩，今场更盛传恩尼斯达伤愈，可以拍住韦拿及普多斯基，前者喺上场联赛赢松本山雅一役亦有进帐，「VIP组合」加埋状态大勇、近5场轰入4球嘅土炮锋将古桥亨梧，绝对有条件同前锋对攻，只係怕前面入埋唔够后面输啫。

事实上，双方近8次交手合共炮製31个入球，当中7次开3球或以上，就证明咗呢一点，今场撑大盘（2.5球）最明智。