今晚意甲头场，「2哥」祖云达斯喺主场迎战史帕尔。祖记有王牌C朗伤愈复出，佢喺啱啱嘅世界足球先生选举只得第3，谷埋成肚火，正好当史帕尔係沙包咁出气，不过近期防线唔多稳阵，捧2.5球嘅入球大更稳阵。

（myTV Gold 301、Now 638、有线654、614、661及601台周六晚9时直播）

祖记王牌C朗一向係各项颁奖礼常客，但日前国际足协颁奖礼佢称伤未有畀面出席，最终喺世界足球先生选举只得第3名，就算係预咗冇份，但不嬲要面唔衰得嘅佢一定条气唔顺，近日呢位射手已好番兼训练，似乎已经做好「开火」准备。今季喺功勳主帅阿里基离队后，祖记请嚟前车仔主帅沙利执教，其打法以进取见称，近5场有4次开3球或以上，C朗梗係like爆喇，近2次喺地头出击皆有士哥外，前仗联赛斗维罗纳，更交出助攻畀首次正选上阵嘅艾朗蓝斯建功，因伤抖咗1场即复出，攻力有保证。

不过祖记防线难言稳阵，尤其係两位中坚新援马菲斯迪历特及美列迪美罗，明显仍未适应意甲踢法，经常出现甩漏情况，其中新星马菲斯迪历特更被寸为「荷兰菲尔锺斯」，信心唔够易出事。

史帕尔防守能力差
另一边厢，史帕尔防守能力相当差，联赛连盃赛近6场都有失波，其中5场开3球或以上，包括近2仗联赛对莱切同萨斯索罗失咗6粒，今场都係死路一条。但主W赔率冇肉食，而祖记下周中又有欧联跟尾，让球主胜要让到2球咁辣，又略嫌过火得滞，不如转捧2.5球嘅大盘好过。