主场出击冇甩拖
周中西甲快车连场激战，其中周三凌晨巴塞隆拿主场同维拉利尔上演焦点战。争取衞冕嘅巴塞今季开局令人大跌眼镜，好彩主场出击表现依然有保证，为重回胜轨今仗肯定抢攻，半场主胜值得留意。

（Now 611及632周三凌晨3时直播）

力争3连冠嘅巴塞，今季衞冕之路起步就遇上唔少阻滞，继开咧战0比1作客不敌毕尔包之后，上仗作客再以0比2输畀今季重返西甲嘅CF格兰纳达，开咧冇耐就惨吞2败，创下主帅华尔维迪上任以嚟最差联赛开局。为免进一步畀马德里体育会同皇家马德里等争冠对手抛离，今场必定抢攻。

好彩过去两季巴塞喺联赛统治级表现，今季仍然可以喺主场见到，近2仗联赛主场面对贝迪斯同华伦西亚，巴塞都以5比2雷霆万钧之势击败对手，可见呢支坐拥基沙文、苏亚雷斯同法兰基迪庄等顶级球星嘅西甲班霸，整体质素依然超班，加上头号球星美斯康复之后，已逐渐揾番比赛状态，今仗由佢领军，巴塞战力值得期待。

维拉利尔对赛多捱打
收穫联赛2连胜嘅维拉利尔近况回勇，不过后防欠稳一直係困扰「黄色潜水艇」嘅一大难题，今季情况依然未见起色，难畀到球迷信心，尤其球队近年都畀巴塞食住，近5次交手1和4负处于劣势，其中4次半场就已经落后。今次面对急需一场大胜重振雄风嘅巴塞，维拉利尔随时由头输到落尾，一于捧巴塞半场主胜。