巴塞隆拿同皇家马德里多年嚟都係西甲冠军嘅主要竞争者，然而两军近年出现整体竞争力下滑嘅迹象，反观曾于2013/14赛季打破两强垄断局面嘅马德里体育会，喺铁帅施蒙尼带领下表现稳步上扬，今届更有可能再次打破西甲传统秩序。
开咧3连胜露锋芒
衞冕嘅巴塞过去连续两季西甲封王，展示统治级实力，其中过去3季勇夺联赛神射手嘅美斯，喺巴塞阵中堪称举足轻重，球王状态好与坏，直接影响巴塞成绩，「美斯依赖症」亦成为主帅华尔维迪，同一班巴塞队友要应付嘅一大难题。季初美斯因伤倦勤，巴塞联赛3仗仅取1胜1和1负，可见就算新加盟嘅基沙文几好波，都难担起进攻重责。已经踏入职业生涯尾声嘅美斯就算再无敌，都有力不从心嘅时候，如果巴塞再唔变革，今季衞冕之路相当难行。
上季皇马经历动荡期，主帅教鞭又落番喺功勳教头施丹手上，唯一不变反而係飘忽嘅联赛走势。今季「银河舰队」捲土重来，虽然重金引入夏萨特同卢卡祖域等强援，不过新兵磨合需时，球队状态时好时坏问题未见改善，重夺联赛冠军希望依然淼茫。相反由施蒙尼领军嘅马体会，今季虽然经历阵容大改动，但未有丝毫影响球队整体表现，开咧至今豪取3连胜，已经抛离皇马同巴塞两大竞争对手。马体会对上一次开咧3连胜就係13/14赛季，当时佢哋最终以3分差距力压巴塞同皇马，成为联赛王者，今季再次挑战霸权绝非冇可能。