5大联赛冠军同你寻宝
经过一个礼拜国际赛期之后，球迷眼光又再聚焦番喺各地嘅联赛角逐喇！欧洲5大联赛起步初段似乎有唔少惊喜，究竟今季係咪会有新局面，破旧立新，抑或係固有势力可以继续垄断联赛，本报各位名家都有佢哋嘅心水冠军推介，大家都可以玩少少，睇吓自己够唔够眼光！
经过4轮角逐之后，英超只有3队保持不败，就係现排头3位嘅利物浦、曼城同李斯特城，其馀Big 6球队阿仙奴排第5、曼联第8、热刺紧随其后第9，车路士就喺下半版第11位。至于季前被视为第7势力嘅爱华顿同狼队，前者恰如其分暂排第6，狼队就表现失望，只得3和1负仲未开斋。
季初几周已经有Big 6对撼，包括首轮曼联主场大炒车仔4比0，次轮曼城主场2比2和热刺，利物浦主场3比1击败阿仙奴、最后阿仙奴主场踢和热刺2比2。联赛角逐係长途战，讲求稳定性同板櫈深度，曼城同利物浦喺Big 6当中，呢两方面确较其他球队优胜，不过如果睇埋赔率，「蓝月亮」只得1.33倍未免热咗啲，利物浦嘅2.6倍就相对合理抵玩。
新兵对办阿仙奴冷门之选
想扒冷嘅球迷不妨试吓阿仙奴，相对起曼联嘅更衣室乱局、车路士唔够人用、热刺起步脱脚，「兵工厂」今夏引入嘅丹尼施巴路斯同尼高拉斯比比已经证明啱用，奥巴美扬同拿卡锡迪亦早早有料到。同样係新加盟嘅中坚大衞雷斯虽然感觉上有啲飘忽，但佢好起上嚟真係会好癫，而且阿仙奴唔使踢欧联，踢欧霸可作出轮换嘅空间大增，大大增加佢哋联赛竞争力，呢队波虽有缺点，但换来35倍嘅赔率，值得一博。