女子世盃今晚上演最后2场8强大战，头场先有意大利女足斗荷兰女足。论抢镜程度，今届4战全胜嘅荷兰无疑较优胜，不过睇番荷兰4场比赛都係下半场中后段入波先奠定胜果，连续4场开出半场和，表现慢热；意大利同男子队一样作风保守，比赛初段亦唔会过分抢攻。有一点值得留意，双方之前4场比赛对手都唔係欧洲球队，今次遇上风格接近嘅对手相信会更小心，首选半场和。
（有线603及604台周六晚9时直播）
德国往绩食住瑞典
至于尾场则由德国女足硬撼瑞典女足。德国分组赛表现虽然唔及另一支夺标热门美国大炒对手13球咁有霸气，不过却贯彻咗「日耳曼民族」嘅稳健作风，由头2场以1球小胜中国及西班牙开始，到之后加埋派咗7蛋畀2支非洲代表南非及尼日利亚，状态持续冒升，而且德国係今届唯一一支冇失过波球队，稳健防线绝对係争标最大本钱。瑞典论实力喺女足界亦係数一数二，不过自从王牌舒莲退役后，瑞典对住一线强队经常处下风，例如今届分组赛就曾经淨吞美国2蛋，而且瑞典近5次斗德国只得1和4负，包括上届于16强大败1比4，今次想复仇唔係话咁易，德国让半一波童捧上盘。
（有线603及604台周日凌晨零时30分直播）