新攻击铁三角拉唔住
美洲国家盃今晚续演8强大战，委内瑞拉将会挑战由球王美斯领军嘅阿根廷。阿根廷上场击败卡塔尔取得出线权后，美斯扬言依家先係真正开始，大有一洗颓风嘅决心，不过委内瑞拉近年已非鱼腩，既然双方近5次交锋4次总入球达3球或以上，波童建议捧2.5球大盘最稳阵。
（Now 650及Now E周六凌晨3时直播）
阿根廷今届头2场分组赛斗哥伦比亚及巴拉圭只得1分，结果要到最后一轮以2比0击败卡塔尔，先至攞到8强席位，虽然阿根廷嗰场表现唔算脱胎换骨，不过首次正选拍档攻坚嘅拿达路马天尼斯同阿古路各建一功，两人与美斯组成嘅新进攻铁三角总算交到功课。美斯赛后扬言呢场胜仗增强咗阿根廷球员嘅比赛信心，同时标示阿根廷嘅美洲盃先真正开始，大有谷底反弹味道，相信今场会沿用上仗赢波阵容力争晋级。
委内瑞拉升呢唔赦强队
委内瑞拉近5届出战美洲盃有4次成功进身淘汰赛，上届8强佢哋正正输畀今场对手阿根廷1比4，不过两军之后3次交锋，委内瑞拉一共攞得1胜2和，包括今年喺热身赛以3比1击败有美斯坐镇嘅阿根廷，表现大有进步。
委内瑞拉今届被编与主办国巴西、秘鲁及玻利维亚同组，结果3战保持不败得5分以次名晋级，强如巴西喺佢哋身上都攞唔到甜头，阿根廷实在冇十足把握可以喺法定时间内解决对手。考虑到两军过去5次交手合力炮製18个入波，当中4次总入球达3球或以上，今场大细中位数有2.5球，转捧大盘最好路。