古天奴法明奴激活锋线
美洲国家盃8强战听朝揭开战幔，打头阵有东道主巴西迎战巴拉圭。「森巴兵团」已经上晒力，以菲腊比古天奴、罗拔图法明奴为首嘅锋线火力全开，无坚不摧，巴拉圭今届3战未赢过都入到淘汰赛，纯粹好彩，撞正弗爆东道主难有运行，巴西就算让两球照捧让球主胜。
（Now 650及Now E周五早上8时30分直播）
艾华顿索拉斯新星上位
冇尼马使乜惊呀！虽然美洲盃开幕前有王牌尼马因伤退队，但巴西主帅迪迪应变能力都算快，先用菲腊比古天奴做进攻核心，之前佢效力利物浦时劲夹嘅罗拔图法明奴，亦力压「耶稣」加比尔捷西斯获得担正机会。两人故剑重逢默契十足，悭番磨合时间，巴西喺A组3场分组赛取得2胜1和，共轰8粒兼冇失过波，淨係佢两个夹埋入咗3球兼交出3次助攻，全面激活森巴锋线。
巴拉圭冇料到侥倖晋级
对于迪迪嚟讲，今届最大发现一定係艾华顿索拉斯，呢位甘美奥翼锋因为愈打愈好，已经由后备打到变正选，而且今届已有两球进帐，包括揭幕战对玻利维亚嘅世界波，坚係Sharp醒。连同临时代替尼马入伍嘅韦利安，上仗大胜秘鲁5比0之役后备入替亦轰入靓波，「森巴兵团」几支大炮已经挞着晒，火力唔讲得笑。
另一边厢，巴拉圭表现相对令人失望，今届喺B组3场分组赛只得2和1负，若非C组嘅日本喺尾轮赢唔到，巴拉圭已经执包袱走人喇！事实上，佢哋仲要靠36岁老将奥斯卡卡度素数胡，明显仍处于青黄不接阶段，1场不胜都成为其中1支最佳第3名出线，幸运成分盖过球队实力，但好运嘅嘢可一不可再，遇上剑指冠军、近3仗有2次赢3球或以上嘅巴西，巴拉圭相信难逃大败命运，「森巴兵团」让两球都冇有怕，直取让球主胜。