至于尾场16强会由荷兰女足硬撼上届亚军日本女足。荷兰近年成绩突飞勐进，相反日本水准停滞不前，睇番荷兰近4次对日本赢3次，反映两军实力此消彼长，捧主胜啱数。
（周三凌晨3时开赛）
王牌美迪玛只得22岁
两军连续2届于女世盃16强碰头，上届日本以2比1淘汰荷兰，不过之后4次交手，荷兰攞到3胜1负，包括上年喺阿尔加夫盃以6比2狂数对手，呢个盃赛喺女足界係仅次世盃及奥运嘅大型赛事，极具代表性，可以见到荷兰女足水准进步神速。荷兰女足2年前以主办国身份首度捧走女子欧国盃冠军，当中6战全胜入13球失3球，嚟到今届世盃分组赛亦以3战全胜晋级，表现充满说服力。效力阿仙奴女足嘅王牌美迪玛今年只得22岁，但已代表国家队上阵78次攻入60球，係目前荷兰国家队（男、女子队）入球最高纪录保持者，配合其阿仙奴队友云迪当克及欧国盃金球奖得主马田丝，绝对係今届争标一路奇兵。
上届亚军日本喺D组3战仅得1胜，不但屈居另一支欧洲劲旅英格兰女足之后以次名出线，面对实力一般嘅阿根廷女足亦被闷和0比0，攻守水准今非昔比，唔排除会再次惨败喺现时状态、士气一流嘅荷兰脚下，主胜捧得过。