今晚非洲国家盃头场有D组首轮焦点战，由「大象兵团」科特迪瓦硬撼南非。睇牌面科特迪瓦係赢晒，但呢班波个个各自为战，不宜高估，让唔起近期表现硬淨嘅南非，让球客胜有计。
（myTV Gold 301、now 638、有线654及614台周一晚10时30分直播）
科特迪瓦仍属非洲劲旅，但自从「魔兽」杜奥巴、耶耶托尼、高路托尼等退出国家队后，就算有奥里亚、韦费特沙夏等英超兵助阵，亦未能阻止跌势，唔单止喺上届非国盃分组赛出局，更未能杀入上年世盃决赛周。论个人质素，科特迪瓦绝对唔曳，韦费特沙夏喺水晶宫单天保至尊嘅演出，令佢受到好多豪门垂青，不过「大象兵团」嘅问题在于个个都挂住自己踢，畀人一种散兵游勇嘅感觉，整体合作认真一般，唔係想像中咁劲。
南非近6对赛未输过
南非今届以土炮为主，毫无星味，较为出名嘅係法甲搵食嘅莫菲巴同基根杜尼，但正正因为冇球星，反而更加重视整体战，加上南非联赛近年水准不断冒升，亦令国家队得益，近8仗取得1胜7和未输过，胜率唔高，但胜在硬淨唔易输。翻查纪录，佢哋近6次对住科特迪瓦，竟然录得2胜4和不败佳绩，明显格食格，仲有得受让咁笋，让球客胜咪错过。