喺巴西举行嘅美洲国家盃，听朝同时间会上演两场C组煞科战，其中榜首智利火併乌拉圭。智利王牌阿历斯山齐士（A山）返回国家队即重拾信心频士哥，协助球队提早出线，乌拉圭锋线孖宝苏亚雷斯同卡云尼亦火力全开，加上近年交手例演入球骚，2.5球嘅大盘不容错过。
（Now 650及Now E周二早上7时直播）
哨牙苏卡云尼夹击A山
连续两届美洲盃封王嘅智利，今届衞冕之路开靓个头，头两轮赢晒狂轰6粒，提早获得出线资格坚有霸气，今仗理应留力。不过王牌阿历斯山齐士未必係咁谂，呢位上季喺曼联入得两粒嘅废柴，返回国家队立即翻生，头两轮已入两球，信心返晒嚟，今届美洲盃绝对係佢证明自己嘅最佳舞台，一向坚有斗心嘅A山唔会hea踢。至于乌拉圭头两轮取得1胜1和，出线机会极大，因此冇乜心理包袱，锋线孖宝苏亚雷斯同卡云尼都开咗斋，今届合共有3球进帐，难怪乌军已轰入6粒。而且双方近4次碰头，有3次开3球或以上，3大神锋互斗射术，捧2.5球大盘冇衰。
厄瓜多尔让唔起日本
同组另一场厄瓜多尔硬撼日本，厄瓜多尔头两轮输晒不特止，仲狂失6粒，而且两场都有球员做「红牌阿姑」，包括上轮有后衞阿基利亚喺末段被逐，今仗要坐波监，防线更加唔稳阵。至于应邀参战嘅亚洲球队日本，儘管首轮惨吞智利4蛋，幸好上仗靠三好康儿省两粒，最终2比2打和乌拉圭，两战得1分，争逐其中1支最佳第3名嘅出线席位仍未绝望，以久保建英为首嘅小将活力十足，绝对唔赦厄瓜多尔，何况厄军近4次斗亚洲球队未赢过，冇本钱让波，转捧受让平半嘅日本下盘。
（Now 651及Now E周二早上7时直播）