明早美洲国家盃C组次轮赛事，厄瓜多尔将会恶战智利。厄瓜多尔出师不利首战输波，呢场仲有主力守将荷西昆特路停赛，形势唔乐观；相反争取衞冕嘅智利继续表现出美洲盃强队本色，有望继首胜之后再下一城，客W值博。
（Now650及Now E周六早上7时直播）
力争美洲盃3连霸嘅智利，首轮以4比0大破日本，射手伊度亚度华加斯梅开二度，成功取代传奇射手沙拉斯，以12球成为智利美洲盃史上入波最多嘅球员，过去一季喺曼联表现低迷嘅王牌阿历斯山齐士（A山），亦用1入球1助攻嘅出色表现，力证自己依然係世界级攻击手，状态明显弗番唔少，为进一步靠今届赛事翻身，「A山」呢仗肯定继续搏尽抢攻。
厄瓜多尔质素输一截
厄瓜多尔首战全场处于被动，最终惨吞乌拉圭4蛋，仲有后衞荷西昆特路攞红牌被逐，呢场冇份踢，令原本不稳嘅防线更加弱不禁风，加上队中大部分球员喺美洲联赛搵食，质素认真麻麻。睇番智利近年喺美洲盃踢到风生水起，近7场美洲盃法定时间取6胜1和，呢场乘胜追击问题不大，客胜係不二之选。