美斯同猪队友冇火花
听朝美洲国家盃B组次轮爆发生死战，阿根廷要硬撼巴拉圭。「潘帕斯雄鹰」首轮落笔打三更，美斯搏晒老命都畀班猪队友玩谢，前线又哑火，证明佢同阿古路有几老友都唔work，巴拉圭遇强更唔敢乱攻，中位数2.5球嘅入球细有买趁早。
（Now 650及Now E周四早上8时30分直播）
自上年世盃后获短暂免役，美斯志切今年为阿根廷力争美洲盃冠军，但首轮对哥伦比亚只能与敌方拉成均势，美斯多番製造良机，可惜未能把握，反而因防线两次甩辘就输0比2，坚係猪队友，都咪话唔灰。始终阿根廷缺少一名具创造力嘅中场指挥官，令美斯要身兼射门、组织等多职，远离龙门自然威力大减。虽然佢同阿古路于场外犹如「hehe」般老友，但比赛中再次证明两人未能擦出火花，不断失机，若果继续用佢哋攻坚，唔慌入到波。
巴拉圭受过教训势死守
巴拉圭首战对同组最弱嘅卡塔尔，竟喺领先2球下被对手逼和2比2，除咗防线唔集中之外，前线亦频频浪费拉开纪录的机会，最终失分亦係抵死。查实巴拉圭近年水准每况愈下，唔单止于上届美洲盃分组赛出局，亦已连续2届无缘世盃决赛周，特别自辛达告鲁斯退出国家队后，前线后继无人，上场仲要靠36岁老将奥斯卡卡度素建功，可见人才凋零。巴拉圭吸取教训后，今战面对强敌肯定唔敢再大意，一定玩死守博偷鸡，既然巴拉圭近6场美洲盃分组赛仅入5球，有4场开2球或以下，阿根廷前线又哑火，捧2.5球嘅细盘最上算。