最叻铁血防守
周一早上美洲国家盃C组赛事，乌拉圭对厄瓜多尔。老帅泰巴尼斯带领嘅乌拉圭一向以铁血防守见称，唔会畀厄瓜多尔过多进攻机会之馀，首战亦好可能先贯彻稳打稳扎踢法，中位数2.5球嘅入球细值得留意。
（Now 650周一早上6时直播）
乌拉圭上届未能喺小组出线，表现颇令人失望，可幸去到2018世界盃成功闯入8强，挽回面子。作为美洲盃史上夺冠次数最多（15次）嘅球队，乌拉圭今届强阵出击，绝对係冲击冠军宝座嘅有力挑战者，其中老帅泰巴尼斯除咗倚重苏亚雷斯、卡云尼等经验丰富战将外，亦继世盃后，续用包括卢卡斯托拉拿同宾坦古亚等多位年轻球员，取得不俗效果，呢场佢哋有望继续成为球队中场主力。
近届分组赛少波入
不过要数乌拉圭最引以为傲嘅，非一条铁血防线莫属，尤其队长高甸同荷西基文尼斯长期喺西甲联赛搵食，经验丰富，有佢哋坐镇，后防可以话稳如泰山，厄瓜多尔要入波真係唔係咁易。
厄瓜多尔除队长路尔斯华伦西亚长期喺英超征战之外，其馀大部分球员都喺美洲各地联赛效力，整体实力一般，加上佢哋2019年踢咗4场友赛，竟然一场都未赢过，当中有两场冇入波，前线令人担心，似乎难对乌拉圭构成威胁。睇番乌拉圭近9场美洲盃分组赛，有7次开2球或以下，料今仗会坚持稳打稳扎踢法，中位数2.5球嘅入球细唔好错过。