拉莫斯入唔停卡叔逆流翻生
今晚欧洲国家盃外围赛F组爆发榜首大战，「狂牛」西班牙主场迎战瑞典。西班牙唔单止有「逆流卡叔」辛迪卡索拉翻生，队长沙治奥拉莫斯过去1年披上「狂牛战衣」每每化身「带刀侍衞」，频有士哥；瑞典方面亦有脚风转顺嘅古艾臣助阵，斗攻格局实多波入，2.5球嘅大盘乃不二之选。
（有线662及602台周二凌晨2时45分直播）
西班牙自上年世盃后改由安历基接手，频频换人试阵，除咗发掘具潜力新星外，亦会重召一些回勇老将，包括今次召入阔别「狂牛」4年嘅辛迪卡索拉。呢位曾经历8次手术、几乎要截肢嘅34岁老将，刚季重返维拉利尔不但奇迹复出，仲愈踢愈好，协助「黄色潜水艇」护级成功，从而获「狂牛」重召。
辛迪卡索拉喺日前欧国外大胜法罗群岛4比1之役担正，下半场更代替被换走嘅「准新郎」沙治奥拉莫斯戴上队长臂章，佢赛后都话梦想成真。无可否认，喺呢位「逆流卡叔」助阵下，西班牙由守转攻都变得更加畅顺。
沙治奥拉莫斯上仗被换出前亦顶入一粒，呢位西班牙队长一向喺关键时刻建奇功，但好少连续不断入波，不过佢过去1年变身「带刀侍衞」，近7仗为「狂牛」披甲，竟然轰入6球，亦令佢累积19个士哥，跻身国家队史上射手榜Top 10，仅次于韦拿、鲁尔、费兰度托利斯及布达坚奴等着名前锋，认真犀利，难怪西班牙目前喺F组头3场赢晒排榜首喇。
瑞典古艾臣脚风劲顺
不过瑞典都唔失礼，于小组头3场取得2胜1和排紧次席，前锋古艾臣连续3场都有士哥，脚风劲顺。呢位缅恩斯射手只係为瑞典上阵咗9场，就有5粒进帐，比起马古斯贝治、约翰古达迪等老大哥更有效率。查实瑞典近4仗共轰10球，全开3球或以上，基于西班牙主胜得1.18倍冇肉食，让球主客和要让到两球嫌辣得滞，既然两军踢法都咁进取，中位数2.5球嘅大盘有1.64倍值得捧场。