至于早啲开波嘅欧国联季军战，由瑞士硬撼英格兰。正所谓「季军波、开大多」，尤其见到英格兰中坚史东斯上仗连番甩辘，就知佢哋条后防几咁牙烟喇，而且大家都冇心理包袱，随时对攻攞番个尾彩，2.5球嘅入球大有买趁早。
（香港开电视77台、有线662及602台周日晚9时直播）
史东斯甩辘玩火自杀
瑞士喺4强以1比3不敌「超人」C朗率领嘅葡萄牙，输亦无话可说，英格兰于4强对荷兰激战至加时输1比3，中坚史东斯连番犯错，3个失波都关佢事，其中第2粒坚肉酸，佢喺自己禁区顶控住个波，转晒圈唔知想点，畀迪比上前逼抢即被笃甩个波，累队友基尔获加摆乌龙。赛后英格兰主帅修夫基仲死撑，话后场带波推进係其战术基础，需知道史东斯刚季喺曼城已失去正选，「修哥」仲搵佢踢呢种高章波，犹如玩火自杀，面对同样冲得又烂打嘅瑞士翼锋梳顿沙基利，更易导致失波。
查实两军近期都好攻得，瑞士近4仗轰11粒，英格兰近6仗于法定时间内亦入19球，非常进取。而且每逢大赛季军战，因为已失落争标机会，通常班人会放鬆心情出战呢场例行公事，容易造就入球骚，一于捧2.5球嘅大盘。