决意弥补主场失盃遗憾
周一凌晨欧国联决赛一触即发，主场出击嘅葡萄牙将会同荷兰争冠军。葡萄牙「超人」C朗上仗踢出漂亮一仗，几乎以一己之力带领球队挺进决赛，面对后防表现未如理想嘅荷兰，有力靠地利再发围，葡萄牙让平半上盘值博。
（香港开电视77台、有线602及662台周一凌晨2时45分直播）
葡萄牙对上一次喺本土举行大赛要数到2004年欧国盃，当年喺费高同雷哥斯达等「黄金一代」领军下，一路杀入决赛，其中对荷兰嘅4强大战中，为葡萄牙打开纪录嘅，正正就係初出茅庐嘅C朗，可惜决赛葡萄牙被一致睇好下，最终不敌希腊同奖盃失诸交臂。
猪队友换上好帮手
多年后，已经成为世界顶级球星嘅C朗，除咗已经带领国家队喺2016年捧起曾经失落嘅欧国盃，今次仲有机会弥补当年冇办法喺主场球迷面前捧盃嘅遗憾。深受当地粉丝爱戴嘅C朗，每次掂波都引起全场轰动，上仗佢冇辜负大家嘅期望，个人连中三元为葡军奏凯歌，状态弗到冇朋友，此外，经常被指畀猪队友拖累嘅C朗，呢场有贝拿度施华等前场好手帮波，葡萄牙赢面绝对高唱入云。
连续错过2016欧国盃同2018世界盃2届大赛嘅荷兰，跌落谷底后近期有回勇迹象，佢哋除咗有帮利物浦称霸欧联嘅华基尔云迪积克，队中效力荷甲班霸阿积士嘅法兰基迪庄，亦喺欧联大放异彩令人印象深刻，难怪「橙衣军团」今届欧国联成功闯入决赛。不过相比之下，荷兰整体实力略显失色，4强战32岁老将赖恩巴布就明显冇料到，年轻中坚马菲斯迪历特仲出现低级错误累球队失波，呢场荷兰未必有力顶住葡萄牙攻势，宁愿捧番葡萄牙上盘好过。