今晚C组赛事德国作客白俄罗斯。虽然「日耳曼」主帅勒夫因伤未能督师，但一班后生仔排队等上位，其中德甲铜靴奖「Kai仔」夏维斯有望落场，势必争取表现，但德军后防不稳，客胜冇肉食，转捧2.5球嘅大盘好过。
（有线603及604台周日凌晨2时45分直播）
「Kai仔」夏维斯潜力十足
德国主帅勒夫因健身时玩哑铃整伤胸部送院，要休养1个月，今轮国际赛期由副帅索格领军，反而係一班新仔争上位好时机。其中过几日先20岁嘅进攻中场夏维斯，亦可串演前锋，今季喺利华古逊不断换位都未受影响，联赛轰17球获铜靴奖，极具潜力，之前喺勒夫麾下甚少担正，撞啱哥列斯卡有伤在身，今仗大条道理畀「Kai仔」显身手。
德国喺小组首轮3比2险胜死敌荷兰，后防不稳问题未解决，尤其门神纽亚无复当年勇，近7场仅得1次冇失波，相信索格会扬长避短，用进攻遮掩防线漏洞。事实上除夏维斯外，年轻翼锋基拿比及利莱辛尼都係进攻好手，其中基拿比6次为国效命已入5粒，效率极高。德国近7场轰12球、6次开3球或以上，2.5球嘅大盘有买趁早。