C朗回归恨主场捧盃
周四凌晨欧国联4强大战，葡萄牙主场迎战瑞士。葡萄牙头号球星基斯坦奴朗拿度（C朗）缺席4场欧国联分组赛之后，呢场强势回归，葡萄牙前场实力即刻高几班，加上对手瑞士都有唔少攻击好手压阵，两军绝对有本钱大打对攻战，一于撑中位数2.5球大盘。
（香港开电视 77台、有线602及662台周四凌晨2时45分直播）
首届欧国联经历多场激战之后嚟到最后4强阶段，有主场之利嘅葡萄牙肯定希望可以喺自家球迷面前捧番个盃，当中C朗作为球队领军人物，求胜心不嬲超乎常人，一定唔会放过呢次夺冠机会，2004年葡萄牙喺自己地头举行嘅欧国盃一路杀入决赛，可惜最终不敌希腊无缘冠军，当年仲係一脸青涩嘅C朗赛后哭成泪人，成为葡萄牙球迷不能忘怀嘅一幕。如今C朗唔止成为葡萄牙老大哥，仲由初出道时只识一味死扭烂扭嘅独食仔，成长为世界级入球机器，今季佢首次踢意甲以21个联赛入球成为祖云达斯头号射手，脚风奇顺，呢场有喺曼城表现大熟大勇嘅贝拿度施华，同有望首次为国家队上阵嘅超新星祖奥菲历斯提供侧击支援，葡萄牙火力绝对不容忽视。
瑞士火力勐大盘保证
瑞士喺A2组末轮同比利时嘅大战中，先落后2球嘅情况下连追5球，最终5比2反胜对手抢得4强资格，尽显球队超强前场火力，比赛中大演帽子戏法嘅宾菲加前锋施费洛域，今季喺葡超狂轰23球勇夺联赛神射手奖，呢场返到葡萄牙作赛对佢嚟讲肯定唔会陌生，随时有机会再发围。查实瑞士今届欧国联分组赛几乎场场都大打进攻足球，4场全开3球或以上，呢场随时照办煮碗，中位数2.5球入球大好路。