英甲升班附加赛决赛查尔顿火併新特兰，两军于温布莱球场争夺英冠席位。查尔顿阵中最出名，一定係领队保耶，呢名前列斯联「坏孩子」，旧年3月以看守领队身份接掌帅印，今季全面接手后成绩稳步上扬，加上球队同标准列治为兄弟球会，球员表现好嘅，随时有机会转去比甲，甚至亮相欧洲赛，係搵大钱好机会，所以球员今场一定搏命，平手盘值捧。
（周日晚10时开赛，马会网上文字直播）
查尔顿老细德赫列特2014年成攻收购呢间伦敦球会，呢名比利时富翁同时拥有比甲标准列治、西乙艾干高同德丙卡尔斯耶拿，德赫列特将查尔顿作为标准列治嘅卫星球会，以查尔顿作为青训基地，或者练兵嘅地方，只要球员有表现，或者应该理解为有商业价值，就会转投标准列治，呢啲球员之后或会被兜售，情况就似当年巴舒亚伊，喺标准列治被卖走。球会透过买卖赚钱，球员身价同薪金亦水涨船高，算係双赢局面。
联合国兵团博表现有钱途
大家不难发现，查尔顿同其他英甲球会好唔同，大部分英甲都係以英格兰球员为主，但查尔顿係「联合国球队」，好似升班附加赛准决赛正选阵容当中，有7个不同国籍球员担任正选，包括英格兰、爱尔兰、比利时、荷兰、波兰、德国同法国，佢哋只要有好表现，钱途肯定无可限量。
查尔顿领队保耶对于管理呢班球员甚有心得，以往球员时代嘅「坏孩子」肯定知道球员最想要啲乜嘢，据知查尔顿更衣室气氛非常良好，佢今场要跟同样係42岁嘅新特兰少帅积克罗斯拗手瓜，查尔顿由2月9号开始，到上仗附加赛准决赛次回合，近17战只输过2场，今场开平手盘，绝对值得捧场。