创会10年蓄锐冲首冠
第76届德国盃今晚柏林奥运球场（中立场）上演王者战，RB莱比锡挑战班霸拜仁慕尼黑，莱比锡喺德甲煞科战收起全部主力，蓄锐今仗冲击球会史上首个重要冠军，有力製造麻烦畀拜仁，两军历来交手入球都唔多，让球盘拜仁让一球，建议双选下盘同中位数2.5/3球细盘。
（周日凌晨2时开赛，马会网上文字宜播）
今次係拜仁历来第23次杀入德国盃决赛，佢哋已经赢过18次冠军，係总成绩排第2云达不来梅（6次）嘅3倍，至于莱比锡创会仅10年，最叻只赢过第4级别联赛冠军，德国盃之前连8强都未入过，讲经验简直冇得比，不过莱比锡近年冒起甚速，上届德国盃第2圈面对拜仁，当时法定时间踢成1比1，最终斗到加时兼互射12码，拜仁至险胜，睇番两军历来7次碰头多数少交收，共有5次总入球喺两球或以下，包括今季联赛两循环，莱比锡作客输0比1，跟住主场和0比0，可见佢哋打拜仁会以稳为先，况且，拜仁喺对赛法定时间成绩係4胜2和1负，但近3次交手只係胜和负各1，证明双方实力已经愈嚟愈接近。
尼高高华领军守优于攻
莱比锡喺德甲煞科战收起晒主力，摆明蓄锐今晚争盃，至于拜仁就有中场哥列斯卡因伤缺阵，虽然今仗对教练尼高高华嚟讲係生死战，若然捧唔到盃下季都好难有机会留低，但佢教波始终係防守起家，进攻瓣数不足组织亦唔够流畅，德甲最后两场作客赛事都只能和波收场，加埋只入得1粒，证明作客火力冇保证，好在今仗有门神纽亚伤愈复出把关，又起用防守力最强嘅查维马天尼斯取代哥列斯卡踢防中，令成队波更守优于攻，遇上处心积虑主守嘅莱比锡，恐怕唔係咁易咬得入。