迪基亚施治两大门神成抢手货

今季欧洲各大联赛打埋今个星期就要“冚旗”，只剩几项盃赛及欧洲两大盃赛，欧霸盃与万衆期待嘅欧冠盃决战。

球季虽然接近尾声，但各大球会已经开始密锣紧鼓，准备为下季招兵买马。近日最热嘅转会消息，就係曼联门将迪基亚，今季四大皆空嘅皇马，摆到明要将呢位西班牙新钢门收归旗下，代替旧钢门卡斯拿斯。据闻皇马已经与基仔倾掂个人条件，只等曼联会否放人兼转会费问题。听讲价钱大约四千万欧元左右。不过，到目前为止，曼联似乎唔想放走呢位今季表现相当突出嘅门神，球会更加颁发本年度双料最佳球员畀基仔，希望软硬兼施留住钢门。

但讲真一句，皇马财雄势大，一向要风得风，要雨得雨。小弟冇估错的话，迪基亚下季应该重返西甲效力皇马。

讲开门将，曾经亦叱吒一时嘅捷克门神施治，由于在车仔只做后备，预料下季会弃“车”而逃。以施治嘅身手，不愁冇大会落脚，阿仙奴、曼联或圣日门应係施治的目的地。