嚟英格兰睇波已经唔少次，呢度亦係Peter心仪嘅睇波地方，因为入场睇同我哋多年嚟喺电视睇相比，唔入场睇係睇唔出赛事嘅真髓。例如球场裏面嘅气氛、两队教练点样准备换人等，但嚟得多自然会投入研究呢啲外国顶级「大富翁」（Mega）。好似车路士而家喺联赛一枝独秀，佢哋嘅踢法永远係以攞冠军为大前提，呢场波需唔需要赢，入咗一球就会等对方进攻，然后打快速反击。
好似嚟到英国睇嘅第2场波车路士对曼城，「蓝月亮」由于要兼顾欧联，踢嘅阵式始终冇车路士咁整体，兼夹係主帅哥迪奥拿第1年教曼城，Peter喺球场入面明显睇到佢哋嘅踢法同形势都唔及车路士，所以佢哋係唔能够踢到好似车路士咁水银泻地。
当车路士入咗1球后，就会缩返去后面控球在脚等打突击，当畀曼城追返1球后，又会踢得主动争取第2个入球，完全睇住对手嚟食，所以Peter奉劝大家唔好以为球队主场出击或者形势好就可以大注，因为球员同球队老闆都有本身嘅目标。好似阿仙奴主帅云格帮球队赚到钱，而且年年都喺前列，老闆係唔会胡乱炒佢，所以我哋有我哋嘅睇法，局内人有局内人嘅睇法。
至于点解睇波冇分男女，因为近年嚟英超睇波，发现女球迷真係唔少，而且佢哋仲好识货添，就算赛事门票价钱昂贵都照样帮衬。普通球迷一定做足准备工夫，上网订好门票先会出动去睇波，如果唔买门票就去球场，就只能够帮衬「黄牛飞」任人劏，所以球场内只有正价飞同炒飞。
Peter喺呢刻仍然相信车路士可以攞冠军，热刺上仗虽然最后阶段连入3球反胜，但只係保住渺茫嘅机会，而其他球队已经冇机会。至于另一队好有机会攞到前4嘅球队，就係会喺今年7月19日嚟香港踢英超亚洲挑战杯嘅利物浦。
来英睇波并无分男女、只有分正价飞定炒飞
