热剌上季本来都有好大机会争取英超冠军，可惜佢地喺季尾频频失分，导致夺冠希望幻灭，最终只能以第3名完成球季，不过吸取过上季嘅教训之后，今季球队表现更加稳定。虽然今季车路士早早喺联赛榜领先，本以为可以轻鬆完成余下赛事及提早封王，点知上场车仔喺主场不敌水晶宫，领先距离缩窄至7分，令紧随其后嘅热剌又重燃争标希望，欧霸杯出咗局之后，依家更可以专注本土赛事，今个星期佢哋会喺主场迎战屈福特。
目前排喺联赛榜中游位置嘅屈福特，虽然啱啱取得联赛两连胜，但球队今季作客成绩麻麻，只係赢过3场波，今场仲要对住今季主场暂时录得13胜2和佳绩嘅热剌，情况都应该不太乐观。但主队热剌近期伤兵满营，除射手哈利卡尼继续养伤之外，其余2名中场球员哈利云克斯同拉美拿亦宣布提早收咧，领队普捷天奴当然头痕，不过都冇得谂咁多，球队如果想后上夺冠，除咗要车仔继续失分之余，亦都要自己争气先得。
