墨尔本城射手科拿路利正全力挑战澳职神射手。（Getty Images图片）
next 1/1 pre澳职常规赛嚟到最后两轮，虽然冠军一早笃定咗係FC悉尼，而季后赛出线名单亦都定得八八九九，不过第2至第6嘅排名仍然充满变数，呢个係主宰球队入到季后赛后对手係边队、同埋有冇得主场出赛有关。简单而言，梗係排得愈高愈着数啦，所以，目前排第4嘅墨尔本城今日主场迎战阿德莱德联绝对係寸土必争、必定搏命抢3分，中位数3.5球入球大抵玩。
（有线64及203台周五下午5时50分直播）
墨尔本城喺联赛两连败后，依家得番36分跌咗落第4，由于佢哋比排第3嘅布里斯班狮吼少3分，但就比第6嘅珀斯光辉多3分，踢完最后两轮后，最坏情况「墨城」有可能会跌到落第6位！不过，佢哋亦有机会反先狮吼、爬番上第3嘅。墨城首席射手、乌拉圭前锋科拿路利赛前就强调，要确保球队喺季后赛有主场之利，呢位射手依家以17球排射手榜第2位，为咗争「金靴奖」，就更加会落足力去数胡。何况墨城火力强大，相信入多几球唔係难事。
作客嘅阿德莱德联近4场联赛获2胜2和不败佳绩，令到长期包尾嘅佢哋近期连升两级去到第8位，之但係太迟发力，想追都时日无多啦！虽然阿联无望入季后赛，但冇压力下，预计佢哋反而踢得更放，其中塞内加尔射手巴巴迪亚华拉近4场入4球，希望佢Keep住呢团火啦。有传西班牙教练阿摩会喺季尾离队，剩低2场澳职，梗係要指挥班兵踢多啲好波报答粉丝，依家既然冇嘢好输，呢场同墨尔本城驳火，一啲都唔出奇吖！
