正所谓学无止境，令笔者对足球嘅热情至今依然不减，近日带团到英伦睇波并非只係吃喝玩乐，更与年届71岁嘅殿堂级评述员马田泰莱（夹埋144岁），陪同团友一齐踢波，适逢「大波瘾」嘅圣约瑟书院学弟兼着名DJ林海峰亦在英国，齐齐与英伦华人队踢番场衞生波，真係一乐也。
虽然今次主要任务係带团睇英超，但喺其他时间，笔者会静听马田泰莱嘅高见，以及收看天空体育一众球坛名宿如亨利、加历查、加利尼维利、昆尼等赛前赛后嘅分析，受益不浅。马田泰莱亦有透露，临危受命嘅李斯特城主帅格力沙士比亚查实有料到，并深得球员欢心，至于前任云尼亚里係咪因上季勇夺执教生涯首个高水平联赛冠军后，心态有变反惹来「狐狸」兵变，马田泰莱客观地表示有呢个可能。
依家曼市双雄、利物浦、阿仙奴及爱华顿，联赛唯一目标只係得番争前4嘅欧联入场券，点解会搞成咁？经过笔者吸纳多方高人意见后，得出以下结论，首先利物浦主帅高普嘅压迫打法，对球员消耗很大，在1月突然跌Watt，与英超冇歇冬期、沙迪奥文尼要踢非国杯大有关係；曼城主帅哥迪奥拿今季初到英超，明显需要时间适应及磨合，佢亦低估咗英超嘅难度。
另外，阿仙奴都係老问题，球员斗心不足；曼联若非有伊巴谦莫域单天保至尊，只靠拉舒福特、安东尼马迪尔等二流前锋，点能够赢到英联杯及保住争前4希望呢？爱华顿主帅朗奴高文于限米煮限饭下，亦不能强求太多。讲番听晚英超重头戏，车仔主场迎战曼城，笔者认为打和对车仔冇坏，不妨小注和波。
英伦之旅唔係吃喝玩乐，而是来静听高人讲波经
