球王都係人唔係神，近日足坛茶余饭后嘅话题，梗係球王美斯早前为阿根廷出战世杯外时向球证爆粗，欠缺尊重被重判坐4场波监。近30多年来，球坛巨星都总有令人难以忘记嘅瑕疵，好似马纳当拿曾吸毒，法国球王施丹于2006年世杯决赛施展「铁头功」被逐，相比之下，美斯算係球技与品格兼具嘅球星，但佢只係人，并非完美亦会犯错失控，却即遭围插。
正如马坛「雷神」莫雷拉，近月来奔波于香港、杜拜、澳洲，单计喺香港每周2日赛事，连同晨操係非常忙碌，但近期略为失准，上周叁晚罕有地冇W落袋，随即惹来未尽全力嘅批评，每名运动员嘅状态都会经历高山低谷，呢类批评实属无稽之谈。而能称得上体坛圣人，笔者会数本地足、篮坛各1人，足坛係上世纪50年代嘅本港球员何祥友，呢位前南华前锋技术出众之余，亦脾气甚好，至于篮坛方面，必属上世纪50年代资深国手黄国扬，好波兼有品，更一度有机会征战NBA，可惜受当时白种人当道影响而无缘NBA，不过上述两位本地体坛名宿，人品之好绝对係一等一。
现时运动员薪酬高企，但在资讯发达之下，佢哋无论喺场上定场外嘅一举一动，都犹如被放大镜般透视人前，任何出格嘅行为，都难免会遭到口诛笔伐，往往从高处被打落谷底。话就话食得咸鱼抵得渴，但毕竟人总有脾气，美斯咁做虽然唔啱，但亦可理解，正所谓高处不胜寒，笔者宁愿做个普通人。当专栏见报之时，笔者已赴英国伦敦带睇波团，去睇2场车路士主场赛事（包括昨晚对水晶宫及周中对曼城），如果收到乜嘢风，会尽快向读者报料，坦白讲，车仔呢2场无论係乜嘢战果，相信亦唔会影响其今季封王。
