红军遇强愈强可破爱华顿

2017/03/31 文:陈伟豪

季初气势非常强劲嘅利物浦，本以为佢哋有力争取今届英超冠军，可惜踏入2017年之后，成绩就开始下滑，近10场联赛都只係赢得3场，目前以29战56分排喺第4位，只係比打少2场嘅曼联多4分，依家连头4位置都随时不保，虽然利记今季对住另外5支「Big 6」球队都未尝一败，而且亦係暂时入球最多嘅球队，弊在佢哋表现相当飘忽，近期对住史云斯、侯城、新特兰等下游球队都接连失分，令球队之前累积嘅优势一下子化为乌有，依家只好将注意力集中喺下届欧联参赛资格。

伤兵问题困扰高普

今个星期六利物浦会喺主场迎战同市死敌爱华顿，目前两队喺联赛只係相差6分，所以客队爱华顿都必定会抢攻求胜，红军赛前传来坏消息，阵中攻击球员拉尔拉拿近日代表英格兰国家队比赛时受伤，肯定缺席今场默西塞德打吡，而队长佐敦轩达臣近期亦受伤患困扰，虽有随国家队到西班牙集训，但就未有跟足大军操练，所以状态成疑，亦为领队高普增添不少烦恼，不过红军向来都係遇强愈强，今场波都係值得睇高一线。