悉尼前线双箭保保（右）同荷洛斯高好合拍。（Getty Images图片）
next 1/1 pre今个星期澳职赛程有新安排。为咗畀有份踢亚冠杯嗰几支球队备战，呢轮比赛会分开两个星期嚟踢，3队亚冠杯澳职代表下星期先至登场，今个礼拜就睇住「1哥」FC悉尼主场对中岸水手、同埋听日嘅墨尔本胜利对珀斯光辉先啦！FC悉尼喺上场嘅榜首大战赢咗波后，攞常规赛冠军只係时间问题啫。球队依家嘅目标就係破纪录，而一班球星呢，就要为自己喺国家队席位同前途而战，所以今场无理由会放软手脚，让球主客和FC悉尼让两球，让球主胜一样可放心捧场。
（有线64及203台周五下午4时50分直播）
FC悉尼喺榜首大战以1比0击败墨尔本胜利后，家阵剩番最后5轮比赛，已经领先11分，数字上只要攞多5分，就可以提前夺得常规赛冠军。教练艾莱特为咗keep住班球员专注力，已落柯打要打破澳职史上（10支参赛球队计）最高嘅57分得分纪录。佢哋依家53分在手，距离破纪录目标仅仅相差5分，就可以「理想达到」。
悉尼今日主场出击，当然唔会放过机会啦！巴西前锋保保近两场省咗3球，脚风极顺信得过。FC悉尼今季成绩突出，球员努力有回报，门将胡高域同中场赖恩格兰日前首度入选澳洲国家队30人「世界杯外围赛」名单，但要入围最后23人，今场必须要加多几分肉紧，争取多啲印象分喇！
中岸水手上场落后墨尔本城2球下，一度追到2比2平手，衰在后防犯错累及门将保罗艾素食红兼输12码，最后2比3输波。今场保罗艾素停赛，防守力更为人担心。要知道中岸水手係今季澳职失球最多嗰队，22场联赛失咗42球，依家连首席门将都缺阵，今日对住势如破竹嘅FC悉尼，点顶得住呀？
