啱啱周日骑师「雷神」莫雷拉喺1日内破纪录独取8W，成为近期本港体坛（赛马在笔者心目中都係体育项目）茶余饭后嘅话题，查实骑师都係最佳嘅运动员，从佢哋参加笔者举办嘅足球友谊赛，睇得出佢哋唔单止耐战力强，并有极佳嘅平衡力，因此佢哋唔使狂节食或焗桑拿，只要嚟踢衞生波亦可收减磅之效。莫雷拉能够喺竞争激烈、水准极高嘅本港赛马赛事中1日狂抢8W，等同美斯要喺1场最高水平嘅欧联赛事入8球咁坚，笔者相信呢个纪录係后无来者，能见证如此重要时刻，实在係本港马迷之福，值得津津乐道去回味，而非批评「雷神」垄断。
讲番今晚欧联16强次回合，巴塞返主场再斗圣日耳门，首回合「地上最强」意外地惨败0比4后，好多阴谋论此起彼落，查实球员同骑师都係人，状态总有高低起伏，「雷神」独取8W之前嘅赛马日都食白果喇，巴塞大败有乜出奇呢？但球迷太习惯于爱队输波后，用负面角度作出批评，始终人生在世不如意之事十常八九，假如喺任何事情上都抱负面态度，对个人嘅人生观有好大嘅影响。
好彩笔者一向都充满正能量，凡事都向好嘅方面去谂，能见证咁多体坛纪录诞生，绝对係有今生、冇来世，论到当今球坛坐拥强大火力，可在落后4球嘅劣势下仍有些微机会扭转乾坤，相信只有巴塞，虽然机会非常渺茫，但笔者今晚就买定花生坐定定，等睇「地上最强」创造奇迹喇。
