上季英超以第6名完成嘅「圣人」修咸顿，今季受几名主力球员转会离队嘅影响下，球队成绩一般，长期处于联赛榜中下游位置。不过领队佩尔喺1月转会窗重开之后，由意甲球会拿玻里签入意大利前锋加比亚甸尼之后，球队近期表现有所改善，联赛啱啱2连胜，暂时升番上联赛榜第10位。
修咸顿今季喺阵容上缺少咗沙迪奥文尼同埋加斯安奴柏利，前线攻击力大打折扣，两位上季同样都为球队射入11球，今季分别转投利物浦同中超球队山东鲁能，但球队一直都未搵到合适嘅替补人选，锋线只有查理柯士甸同沙恩朗两名正前锋作选择，进攻变化不大。
季初加盟嘅球员当中，只有列特文表现算係几突出，佢暂时有5个联赛入球，作为翼锋都算唔错喇，而啱啱1月份加盟嘅前锋加比亚甸尼就绝对解决到球队攻力不足嘅问题，呢位意大利前锋上半季为拿玻里上阵13场入3球，欧联踢5场入1球，但一嚟到修咸顿就入球停不了，踢4场已经入咗6球，当中包括联赛杯决赛2次射破曼联大门，两个入球都功架十足，佢亦都係球会史上第一位首3场英超比赛都有波入嘅球员，下周末联赛作客对住热剌，睇下佢会唔会继续有波入先。
