十五十六，通常用来形容人对某些要做决定嘅事情举棋不定，英文则会用catch 22，上季于英超实现「童话式」夺冠嘅「狐狸」李斯特城，现时面临联赛护级，以及快将开打嘅欧联嘅抉择问题，令主帅云尼亚里忐忑不安。
首度征战欧联嘅李斯特城，今届分组赛取得首名出线杀入16强，非常难得，不过睇番佢哋喺联赛，于今轮开打前只得21分排第16位，已经被捲入护级漩涡，形势水深火热，鱼与熊掌难以兼得，究竟一条心继续向奖金丰厚嘅欧联搏杀，还是叠埋心水全力保住英超席位，都真係顶难拣（上世纪60年代本港赛马有一匹名叫「顶难拣」）。查实笔者季前已经预测，李斯特城卖走防守了得嘅中场悍将尼高路简迪，今季能闯入联赛前10已属超额完成，在兼顾欧联情况下，依家沦为护级分子绝不意外。
笔者唔太清楚「狐狸」高层係咪于欧联定下好高目标，但相信护级成功係最基本嘅要求，毕竟英超同样係「金矿」，一旦唔小心降班跌落英冠，要爬番上嚟并非易事，君不见昔日曾在英超企稳阵脚嘅保顿、查尔顿等中型班如今嘅景况吗？反映出英冠争升班同样咁激烈。虽然嚟紧周中欧联16强未到李斯特城登场，暂无后顾之忧，但今晚英超作客护级劲敌「天鹅」史云斯亦很难打，毕竟自新帅保罗基文迪中途接手后，「天鹅」近5仗联赛赢3仗，明显有复甦迹象，究竟「老狐狸」云尼亚里喺护级与欧联之间点样取捨呢？随时好睇过戏。
