经过上轮嘅英超赛事后，联赛只係剩番14场，话就话数字上可以追得到，但以车路士嘅人强马壮，就算有主力球员好似夏萨特及迪亚高哥斯达受伤，但Peter认为「蓝战士」可以再一次梅花间竹地反弹，赢得今季英超冠军。
至于其他球队都係5队争余下3个位，即係第2至第4嘅欧联席位。爱华顿近期虽然踢得好好，仍然以蔗渣嘅价钱踢出烧鹅味道，只係球队应该追唔到上去第6。Peter可以大胆咁讲，除咗车路士笃定攞冠军外，曼城同热刺亦应该可以取得欧联参赛资格，余下1个席位就会由阿仙奴、利物浦同曼联「叁红」争夺。
嚟到呢个阶段，Peter反而觉得由莫连奴执教嘅曼联，最有机会赶上欧联尾班车。「红魔」近期士气唔错，加上去到直路阶段依然保持联赛15场不败，气势非常之好，而且有莫帅嘅运筹帷幄，所以Peter就较为睇好曼联可以赶过「兵工厂」同「红军」搭上欧联尾班车，信不信就由你！
今晚英超早场有阿仙奴对侯城，11点亦有曼联对屈福特，呢两场比较受注目嘅赛事，Peter觉得都係两支主队嘅胜望较高。不过主胜赔率较乏味，所以Peter多数以睇波为主，因为已经畀咗车路士攞冠军同埋边4队取得前4，呢啲已经係最大嘅贴士。
金句：车路士3年两冠已成定局，红衣叁队曼联4强机会至高。
