屈福特自从作客2比1赢咗阿仙奴，除咗首次喺英超击败对手之外，同时亦结束球队连续7场联赛不胜嘅颓势，上场主场更以同样比数击败般尼全取3分，近期成绩可以话係V形反弹，连取6分更令佢哋一下子升上联赛榜第10位。
球队表现脱胎换骨同近期增兵有莫大关係，虽然阵中几名中前场球员包括古迪奥拉，以及谢路美冼佳亚都相继离队，而尼日利亚前锋恩哈路更以2,000万镑转会费加盟中超球队长春亚泰，东来掘人仔。不过领队马沙利亦都喺位置上，作出适当嘅填补，先由爱华顿借用至季尾嘅中场汤卡华利，加入阿根廷翼锋莫路沙拉迪，同埋法国前锋麦巴耶尼安等等，上场对般尼嘅比赛，3位新加盟球员都正选上阵，表现亦非常对办。
汤卡华利喺中场做驳脚同转向嘅工作效果唔错，莫路沙拉迪个人技术好，护波能力强，多次喺左路引球推入中间大位製造威胁；麦巴耶尼安表现就最抢镜，上半场1助攻1入球，喺右路尝试多次突破，侵略性高。呢3位球员嘅加盟，令到本来踢法好单调嘅屈福特，喺进攻方面比之前立体得多，嚟紧联赛就算作客奥脱福都真係未惊过呀！
