李城前锋占美华迪(左)今季表现大跌Watt。
next 1/1 pre上季以奇兵姿态夺冠嘅李斯特城，对比番今季嘅表现就真係强差人意，联赛打咗超过一半，依家排喺联赛榜第16位，排到咁后主要因为作客成绩差所致，球队今季喺联赛作客未尝一胜，现时只比降班区排第18位嘅水晶宫多2分，从分数上睇，佢哋绝对係有护级压力！
李斯特城今季阵容同上季其实变动不大，中前场亦签入卡普斯特卡同施利文尼几位有质素嘅攻击球员，攻击力理应有增无减，但实际情况就啱啱相反，就以足总杯第4圈对打比郡场波为例，对住呢支英冠队伍，全场一次有组织及有威胁嘅射门都欠奉，入嗰两球都係来自对方嘅乌龙球同一次角球，明显「狐狸」喺马列斯同施利文尼两位攻击球员缺阵下，进攻套路会相当单调！
睇番佢哋喺联赛踢咗23场入咗24球，近8场联赛都只係得3个入波，阵中射手占美华迪到目前为止只为球队射入5个联赛入球，足以证明上季李斯特城最擅长嘅快速反击，今季畀对手睇通睇透，再起唔到任何作用。
