高普教波充满激情，令利物浦战绩稳步上扬。
next 1/1 pre今期係笔者英伦之旅嘅下集，正所谓读万卷书不如行万里路，来到英国嘅球场亲身睇波，胜过以往在录音室讲波及坐喺电视机前睇波，何解呢？
除咗感受到当地球迷嘅气氛外，场边与场内嘅距离非常近，在观众席可宏观两军嘅排阵及临场嘅变化，尤其係电视会将焦点集中晒喺带球者，而在现场睇波，可以睇到其他球员喺冇波在脚下点样走位，为带波者拉开空位，好多时车路士足球学校（香港）会带学徒去英国一路睇波，一路喺教练指导下，教识佢哋英超球星点样踢波，特别係无球跑动为队友服务，呢啲係要亲身去到球场先睇得清楚。
睇利物浦嘅比赛，除咗睇主帅高普嘅高压迫打法之外，亦不妨留意吓佢赛后嘅访问，上轮红军反胜史笃城4比1，高普赛后嘅说话并冇睇小对手，只会一针见血地指出对方用乜嘢打法、球队边方面做到好或坏，绝对冇带你游花园，令一些锺意了解球队运作嘅足球人或领队获益良多。高普坦言佢哋嗰套高压迫打法，如果球员唔弗嘅话，根本发挥唔到，就算操得唔错，但撞正球员体能下降，亦未必能打到淋漓尽致，就要因时制宜打番慢啲，并非一成不变。
上期讲过车路士主帅干地变阵「３４３」后，其机动性打法横扫英超，连高普都大讚车仔弗到漏油，佢话利物浦现时只有做好自己，尽力去赢，呢种心态非常抵讚。英超有高普及干地两位水平极高嘅主帅，难怪老一辈嘅莫连奴及云格都被比下去，所以无论你经验有几丰富，绝不能自满，好似作为讲波佬嘅笔者，今次喺英国入场睇波都带埋收音机，听殿堂级评述员马田泰莱讲波，活到老学到老。
金句：
有咗高普、干地两位孔明、周瑜级领队，难怪莫佬、云格相形见绌
