作为一位教练和评述员，我嘅职责係尽量欣赏一个如日方中球员嘅精湛表现；或者发掘一啲明日之星畀球队作为主将，同埋深入浅出报道畀球迷知道。任何一位出色球员煺休，对我嚟讲只係呢一句：「超级巨星兴起的时候，就好像天虹般漂亮，但天虹会来也会瞬间逝去。」近30年来英格兰同世界各地，甚少有唔係靠个人盘扭技术，但表现差唔多好似米高佐敦喺篮球界一样，可以睇佢当红时嘅比赛，真係有今生冇来世，呢位就係「神奇队长」谢拉特嘞。
谢拉特踢中场时澎湃得嚟又唔会一个玩晒，佢嘅活动範围係由自己禁区去到对手禁区边，非常广泛。佢最经典嘅赛事首推2006年英格兰足总杯决赛对韦斯咸，落后1比3时个人连入两球追和；尤其追平一球喺法定时间已过，40码割草式脚面「拉西」第一时间劲射破网，令韦斯咸喺近20年嚟再同锦标无缘，可以话係「神奇顶级超卓」。当然佢喺2005年欧联决赛，带领落后3球嘅红军击败实力更强嘅ＡＣ米兰，亦令我嘆为观止。
我记得喺米高佐敦煺休时曾劝导球迷：「嗱！你唔睇佢，佢就煺休啦！有今生冇来世呀！」谢拉特近年喺美职踢洛杉矶银河，但银河今季季后赛宁重用新人，都唔肯畀谢拉特或者罗比坚尼呢啲老将上阵，令大家冇得同「神奇队长」说再见，我觉得相当可惜。谢拉特同米高佐敦最大分别，係「神奇队长」唔係喺攞完冠军嘅最高峰煺下来，而係喺英超打到残、美职不受重用先离去，呢点属小小瑕疵。
不过谢拉特始终係常人，同我哋一样唔係上帝，佢畀到我哋大约15年光辉嘅足球时光，我哋唔好去谂负面报道，一于同佢讲：「再见吧！神奇队长STEVIE G！希望快啲有另一个似你嘅球员出现！」讲番推介，红军主帅高普近期警告球员，如果佢哋继续自满「鬆毛鬆翼」，12月就唔会畀佢哋落场，今晚主场对新特兰赢面高唱入云，相信入球亦唔少，一于捧入球大！
（Now 621及LeSports HK应用程式周六晚11时直播）
金句：神奇队长STEVIE G谢拉特才是神、我桂神唔係！
