英超榜首位置又有变动！上星期利物浦作客修咸顿被对手闷和痛失两分，而车路士喺主场就以1比0小胜米杜士堡之后，暂时以9胜1和28分顺利升上联赛第1位。
车路士喺开季成绩其实唔算太过理想，主要塬因係后防出现严重问题，受伤兵影响，加上个别球员状态不稳，头6场英超赛事就一共失咗9球，幸好领队干地喺转会窗关闭前签入巴西守衞大衞雷斯，将本身4人防线改为佢最常用嘅3中坚打法，配合尼曼查马迪同尼高路简迪两位防守力较强嘅中场，后防问题立即得到明显改善，近6场联赛全胜兼不失1球，连季初头几场比赛经常犯错导致失波嘅加利卡希尔亦愈踢愈好，证明球员已经开始适应干地要求嗰种343打法。
防线守得之余，前线亦好攻得；球队近6仗攻入17球，夏萨特今季状态大勇，暂时已经为蓝战士贡献7个入球，表现同上季比简直係判若两人，而迪亚高哥斯达上场亦射入佢今季第10球，依家喺射手榜排第1位，脚风咁顺，唔知周日凌晨上演嘅联赛，车仔主场对热刺嘅伦敦打吡，又会唔会靠佢打破热刺嘅不败之身呢？
