奇连士文与哥迪奥拿两位「踢而优则教」嘅少帅，命途可谓截然不同。美国国家队喺「奇哥」带领下，2014年世杯杀入16强，可惜近2年战绩下滑，其中本月世杯外惨吞哥斯达黎加4蛋乃近10年最差演出，儘管美国足总一向好信奇连士文，仲畀佢兼任技术总监，无奈「奇哥」过于执着推动改革，反而令佢失去对更衣室嘅控制，加上出线世杯形势不利下，美国足总惟有请佢食「无情鸡」。美国体育界都以成绩行先，「Forget the glory before and don't dwell in the past」，意思係唔好缅怀过去，成绩唔掂就要一刀切，唔好因昔日功绩再错落去，呢种果断笔者非常认同。
另一边厢，哥迪奥拿今季为曼城带来tiki-taka打法，季初10连胜嘅美妙开局，令佢深信自己嗰套可行，因此继续无视同佢唔咬弦嘅功勋老臣耶耶托尼，当年耶耶被巴塞卖去曼城，正是哥帅觉得佢唔适合打法。但「蓝月亮」其后一度6场不胜，加埋上周国际赛过后，一众国脚拖着疲惫身躯归队，哥帅决定摆低成见，日前联赛对水晶宫，让唔使踢「太公波」兼操练积极嘅耶耶复任正选，佢即时省2粒带领球队赢波，赛后哥帅认衰，仲暗示若果欧联杀入淘汰赛，会加番耶耶托尼入大军名单，可见哥帅绝非死牛一面颈。讲番今晚欧联C组曼城作客慕逊加柏，笔者相信「蓝月亮」可赢波，与巴塞携手出线。
金句：
成见+执着=失败输波，应变+不死牛一面颈=成功反弹
