今晚英超只得米杜士堡对屈福特及修咸顿对般尼，戏码认真麻麻，就算炒埋一碟，都唔及周二凌晨特别场嘅双红会──利物浦主场火併曼联咁瞩目。两军一向劲多牙齿印，如果大家有睇呢个专栏嘅话，笔者于开季时曾预测，今季夺冠机会最高嘅，离唔开曼市双雄及利物浦，Peter依家仍坚持此观点，若果「双红」想追赶哥迪奥拿领军嘅「1哥」曼城，喺呢场首循环嘅传统大战，实在不容有失，相信两军都以赢波为目标，和波只会落得两败俱伤。
曼联早前频频失分，今仗对佢哋争标嘅重要性不言而喻，净係睇夺冠无数、但近年有点进煺失据嘅红魔新帅莫连奴，能否击败计仔多多嘅红军领队高普，带领曼联重上正轨，证明自己并未江郎才尽，已经值回票价喇，呢场胜负分分钟成为双方今季争标路途上嘅转捩点。
除咗英超双红会之外，踏入10月中，对锺意球类队际运动嘅球迷来讲，好难有觉好瞓喇，由凌晨睇到朝早，何解呢？因为笔者至爱嘅美国职业棒球大联盟（MLB）季后赛，两大联盟──美国联盟同国家联盟于近期早上踏入决赛阶段，再之后就会由两个联盟嘅冠军，争夺世界大赛冠军。其中国家联盟决赛，由笔者爱队洛杉矶道奇，对住大热芝加哥小熊，虽然小熊已经108年未尝夺冠，犹如中咗魔咒，但今季佢哋状态大勇，刚杀败叁藩市巨人打入决赛，究竟能否打破百年无冠魔咒呢？另一边厢，美国联盟决赛则有点冷味，由多伦多蓝鸟对克利夫兰印第安人，睇完英超双红会，等待黎明再睇MLB，节目丰富好过生日。
