上季英超盟主李斯特城绰号「狐狸」，而带领佢哋神奇夺冠、一头银白髮嘅意籍主帅云尼亚里，绝对係足智多谋嘅「老狐狸」。李斯特城今夏面临豪门挖角，主力防中尼高路简迪率先跳船上「车」，云尼亚里深知前路难行，尤其係讲求耐力嘅「长途赛」英超，要成功衞冕确实难过登天，因此只求尽做，惨败畀曼联同利物浦唔算羞家，闷和阿仙奴及击败般尼、史云斯亦发挥正常，贯彻云帅先求「护级40分」嘅务实作风。
去到另1个战场──欧联，李斯特城难得抽到好籤，喺G组只遇上布鲁日、波图及哥本哈根，打出传统意大利式嘅稳守突击，头2仗全胜兼保持不失球，只要攞多4分，即好大机会首名出线16强。教波同做人一样，要有自知之明切忌死充，云帅未有因流失主力而盲目扩军，并喺限米煮限饭下，睇准时机买入唔算贵嘅施利文尼等新兵，既冇令实力大削，若能于欧联杀入16强甚至8强的话，又可赚番笔，何乐而不为呢。虽然今晚劲多赛事，但笔者想提提大家，周日晚英超有场榜首大战──次席热刺主场对「1哥」曼城，咁有睇头咪错过。
金句：狐狸人贵自知，今季搵钱欧联入16强
